Io fitiavana io ihany avril 26, 2008

Rehefa ilay voadom-pitiavana iny ny olona iray dia mametraka fanontaniana be dia be ao an-dohany ao, tongatonga saina tsara dia somary manenina indraindray, mahatsiaro marary sy maratra! Fa inona tokoa ilay fitiavana e? Misy karazany firy izy, toa sady mahay mampijaly no mahay mahasambatra?

Inona no atao hoe fitiavana?

Raha famaritana dia tsy mbola nisy ny hoe nianarana na marimaritra iraisana fa samy manana ny hahafantarany azy ny tsirairay. Fihetseham-po izy io, misy karazany 3, fa ny fitiavana HEROS na fifankatiavan’ olon-droa no resahantsika betsaka eto. Eo amin’ny fotoanan’ny fahamaotiana no aniriany matetika, izany hoe 12-15 taona eo, amin’ny ankapobeany izany! Tia olona iray ianao rehefa mahatsiaro fa sambatra sy voaaro eo anilany, rehefa miaraka aminy. Tianao koa izy matoa mahatsiaro fahabangana iray tsy azo azavaina izay ianao rehefa tsy eo izy! Tsy mifidy tavan’olona na saranga ny fitiavana fa rehefa mitsiry izy dia sarotra vonoina, indrindra moa fa raha hoe noterena hitsiry alohan’ny fotoana izy!

Fa maninona ny fitiavana no malaza sy manan-danja be eo amin’ny fiaraha-monina?

Malaza izy satria zavatra tsy azo lavina, misy amin’ny olombelona tsirairay. Manan-danja koa izy satria tsy vaivazy na kilalao, tsy azo amboarina na foronina tahaka ny hatezerana, ny alahelo na ny hafaliana izy fa voajanahary. Saingy azo atao ny mampandefitra azy amin’ny fotoana ilaina izany.

Ny olana tena mpitranga eo amin’ny fitiavana dia ilay hoe tiako nefa tsy tia ahy, tia ahy nefa tsy tiako. Eo koa ny olana eo amin’ny manodidina sy ny fiaraha-monina. Tsy lavina fa olan’ny fitiavana ihany koa ny fampirafesana na fitiavana olona iray hafa mihoatra noho ilay efa miaraka aminao! Tsy voatanisa fa maro ny zavatra mateti-pitranga ao anatin’ny fitiavana: hasambarana, hafaliana, sedra samihafa, fahasahiana, fifandeferana, fifamonjena, indrindra moa ny ranomaso rehefa tena tafalatsaka.

Hatraiza ny fetran’ny fitiavana?

Tsy mety hanam-petra mihitsy ny fitiavana satria ny olona tia dia tsy mety ho afa-po mihitsy! Anjaran’ny tsirairay fotsiny no mametraka ny faritra tsy azony hihoarana sy tsy ho zakany intsony.

Ny toetra mampiavaka azy

Manana fahavalo maro izy, rehefa mifankatia dia tsy mifandainga.Matetika ny fitiavana dia manana toetra mampanenina izay koa, kanefa  « l’amour c’est comme la santé, on n’en connait la valeur que quand on le perd »!

Noho izany, tsy ratsy akory ny mitia, ny olombelona rehetra rahateo dia samy mila fitiavana avokoa ary tsy hisy mety ho afa-po mihitsy, mahaiza fotsiny mametraka fetra ho an’ny fitiavanao!